އައްޝައިޚް މުހައްމަދު ސިނާން
މާތް ﷲ މީސްތަކުންނަށް ވަޢުދުކުރައްވާފައިވާ ޤިޔާމަތްދުވަހަކީ ބިރުވެރި ދުވަހެކެވެ. އެ ދުވަހުގެ ބިރުވެރިކަން ތަފާތު އެކި ގޮތްގޮތަށް މާތް ﷲ ވަނީ ކީރިތި ޤުރްއާނުގައި ބަޔާންކުރައްވާފައެވެ. މާތްވެގެންވި ނަބިއްޔުން ވަނީ އެދުވަހާމެދު މީސްތަކުންނަށް އިންޒާރުކުރައްވާފައެވެ. އެދުވަހަކީ މީސްތަކުން އެތައް އިރަކަށް ކޮޅަށް ތިބެންޖެހޭ ދުވަހެވެ. އެއީ ހިތްތަކަށް ބިރުވެރިކަން ގެނެސްދޭ ދުވަހެވެ. އެއީ ހަމަ ޔަޤީނުންވެސް އަންނާނެ ކަމަށް ވަޢުދުކުރެވިފައިވާ ދުވަހެވެ. އެއީ އެދުވަހެއްގައި ބޮޑުވެގެންވާ އެތައްކަމެއް ހިނގާނެ ދުވަހެވެ. ދުވަހަކުވެސް އަހާފައިނުވާ ގަދަފަދަ އަޑެއް އިވޭނެ ދުވަހެވެ. އެންމެހާ މީސްތަކުން ބިރުވެތިވެގެންވާނެ ދުވަހެވެ. މީސްތަކުން އެބައިމީހުންގެ ކަށްވަޅުތަކުން ނެރެވި ބައިބަޔަށް އެޅޭނެ ދުވަހެވެ. މަޑުމަޑުން މީސްތަކުންނާ ކައިރިވަމުން އަންނަ އެބައިމީހުންގެ ޢަމަލުތަކުގެ ޙިސާބު ބެލެވޭނެ ދުވަހެވެ.
ޤިޔާމަތްދުވަސް ޤާއިމުވާނީ ހުކުރު ދުވަހެއްގައެވެ. އެދުވަސް އައުމަށްޓަކައި މަލާއިކަތް ބޭކަލަކު ތާޅަފިލި ފުންމަވާ ލައްވާނެއެވެ. އެ މަލާއިކަތް ބޭކަލަކު ޚަލްޤުކުރެއްވުނީއްސުރެ ހުންނަވަނީ ތާޅަފިލި އެބޭކަލެއްގެ އަނގަފުޅުގައި ޖައްސަވައިގެން މާތް ﷲގެ އަމުރުފުޅު އަންނާނެ ވަގުތަށް އިންތިޒާރުކުރެއްވުމުގެ ގޮތުން އަރުޝިކޮޅަށް ބައްލަވައިގެންނެވެ.
ތާޅަފިލި ފުންމަވާލެއްވުމާއެކު މި ކާއިނާތަށް ބޮޑެތި ބަދަލުތަކެއް އަންނާނެއެވެ. މަތީގައިވާ އުޑު ފަޅަފަޅައިގެންގޮސް ރަތްކަންގަދަ ފިނިފެންމާ ކުލައިގެ ތެޔޮގަނޑެއް ފަދައިންވާނެއެވެ. ފަތްފުށްތަކެއް ފަށްޖަހާލެވޭ ފަދައިން އުޑު ފަށްފަށް ޖަހާލެވޭނެވެ. އެ އުޑުގައިވާ ތަރިތައް ވެރި، ބުރަބުރައިގެން ދާނެއެވެ. އަލިކަން ގަދަ އިރުގެ އަލިކަން ފިލައިގެން ދާނެއެވެ. ހަނދުގެ އަލިކަން ފިލައިގެންގޮސް އިރާ އެއްކޮށްލެވޭނެއެވެ. ކަނޑުތައް އިރައިރައިގެންގޮސް އެކަނޑުތަކުގައި އަލިފާން ރޯވާނެއެވެ. ކަށްވަޅުތައް އެ ފުށްމިފުށަށް ޖަހާލެވޭނެއެވެ. ބިމަށް ޒަލްޒަލާތައް އައިސް، އެ ބިން އިރައިރައިގެންގޮސް، އެ ބިމުގައިވާ ކަންޒުތަކާއި ޚަޒާނާތައް ނެރި އުކާލާނެއެވެ. ވަރުގަދަ ފަރުބަދަތައް ބިމުން ލުހި، ބުރުވާލެވޭ ކެހެރިތަކެއްފަދައިން ވާނެއެވެ. ޖަނަވާރުތައް އެއްކުރެވި އެ ޖަނަވާރުތައް އެ ތަކެތީގެ ދަރިން ދޫކޮށްދާނެއެވެ.
މާތް ﷲ މާތްކުރެއްވި އިންސާނުންގެ ޙާލަކީ ފަހެ ކޮބައިތޯ؟ އެއީ މީސްތަކުންނަށް ބޮޑު ދުވަހެކެވެ. އެ ދުވަހެއް ވާއިރު މި ބިންމަތީގައި ތިބޭނީ އެބައެއްގެ ހިތުގައި އީމާންކަމުގެ ޒައްރެއްގެ މިންވަރުވެސް ނުވާ ނުބައި ކާފަރުންނެވެ. ކިރުމައިން ކިރުދޭ ދަރިންގެ މަތިން ހަނދާންނެތި، އަދި މާބަނޑުއަންހެނުން ބަނޑުގައިއޮތް ދަރި ވިހައި، އަދި މީސްތަކުން މަސްތުވެފައިވާފަދައިން ވާނެއެވެ. އެދުވަހެއްގައި މީސްތަކުން ބިރުން އެބައިމީހުންގެ ލޯތައް ބޮޑުވެ، ހިތްތައް ލަގޮނޑި ވަޅާހަމައަށް އަރައިގެން އަންނާނެއެވެ. އެބައިމީހުންގެ ކަށްވަޅުތަކުން އެބައިމީހުން ނެރެލާނެއެވެ. "ތިމަންމެން ނިދާފައި ތިއްބާ ދިރުއްވީ ކޮންފަރާތެއްތޯ" ގޮވާ ހަދާނެއެވެ. އެންމެހާ އިންސާނުން އެއްވެސް ފޭރާމެއް ނެތި އޮރިޔާން ޙާލުގައި ކަށްވަޅުތަކުން ނުކުންނާނެއެވެ. އެބައިމީހުން ވާނީ ޚިތާނުނުކޮށްވާ ޙާލުގައެވެ. އެދުވަހުގެ ބިރުވެރިކަން ބޮޑުކަމުން އަންހެން ފިރިހެން އެއްކުރެވިފައިވާހިނދުވެސް އެކަކުއަނެކަކަށް ބަލާލަންވެސް ހަމަ ނުކެރޭނެއެވެ. އިންސާނާ މި ދުނިޔެމަތީގައި އެންމެ ލޯބިވެގެން، އެބައެއްގެ ހިމާޔަތުގައި އުޅުނު މައިންބަފައިންނާއި އަނބިދަރިންނާއި އަޚުންނާއި އެކުވެރިންނާ އެދުވަހުން ފިލަންދާނެއެވެ. އެބައިމީހުންނަށް ނުފެނި ވޭތޯ މަސައްކަތް ކުރާނެއެވެ. އެއީ އެ ދުވަހެއްގެ މިންވަރު 50 ހާސް އަހަރުގެ މިންވަރު ވާ ދުވަހެކެވެ. އެމީހެއްގެ އަނބިދަރިންނާއި އެކުވެރިންނާއި ދުނިޔެއާއި ދުނިޔޭގައި ވީހާ ބަޔަކާ އެއްޗެއް ފިދާކޮށްގެންވެސް އެދުވަހުގެ ޢަޛާބުން ސަލާމަތްވުމަށް އެދޭނެއެވެ. ކާފަރުންނަށް އެއީ އުނދަގޫކަން ބޮޑު ބުރަ ދުވަހެކެވެ. ދުނިޔޭގައި ދުވަސްތައް ހޭދަކުރެވުނު ގޮތާމެދު ހިތާމަކޮށް އަލުން ދުނިޔަވީ ޙަޔާތަށް ފޮނުއްވާތޯ އެދޭނެއެވެ.
ލޮބުވެތި އަޚުންނާއި އުޚްތުންނޭވެ! މިފަދަ ބިރުވެރި ދުވަހަކަށް އީމާންވެ، އެ ދުވަހާމެދު ބިރުވެތިވުމަށް މާތް ﷲ ވަނީ އަންގަވާފައެވެ. މީސްތަކުންކުރެ ގިނަމީހުން ފަދައިން އެ ދުވަހަކީ ދުރުގައިވާ ދުވަހެއްކަމުގައި ދެކި އެ ދުވަހާމެދު ޣާފިލުނުވާށެވެ! އެ ދުވަހަކީ ދާދި ގާތުގައިވާ ދުވަހެކެވެ. ކޮންމެ މީހަކުވެސް މަރުވުމާއެކު އެމީހެއްގެ މައްޗަށް ޤިޔާމަތް ޤާއިމުވީއެވެ. މަރުވުމަށްފަހު އިސާހިތަކު އެދުވަސް ވާނީ ޖެހިފައެވެ. ކާމިޔާބުވެރިޔަކީ އެ ބިރުވެރި ދުވަހަށް ތައްޔާރުވެއްޖެމީހެކެވެ. ތައްޔާރުވާން އޮތް ތަނަކީ ދުނިޔަވީ ޙަޔާތެވެ. އެދުވަހުގެ ބިރުވެރިކަމުން ސަލާމަތްވުމަށް ބޭނުންވަނީ އެދުވަހުގެ ވެރި ރަސްކަލާނގެ ރަޙްމަތެވެ. އެ ރަޙްމަތް ލިބޭނީ ދުނިޔޭގައި އެކަލާނގެއަށް ކިޔަމަންގަތް މީހަކަށެވެ. އެފަދަ މީހަކަށް ވުމަށް އަވަސްވެގަންނާށެވެ! މަރު އައިސްޖެހުމުގެ ކުރިންނެވެ. އެ މަރަކީ ކުއްލިއަކަށް އަތުވެދާނެ، ދާދި ގާތުވާ މަރެކެވެ.
