އައްޝައިޚް މުހައްމަދު ސިނާން
އެއީ ޛާތުއް ރިޤާޢުގެ ނަމުން ނަންދެވިފައިވާ ހަނގުރާމައަށްފަހު ރަސޫލުﷲ صَلَّى اللهُ عَلَيْهِ وَسَلَّمَ އާއި އެކަލޭގެފާނުގެ ޞަޙާބީން މަދީނާއަށް ކުރެއްވި ދަތުރުފުޅެވެ. މި ހަނގުރާމަ ހިނގާފައި ވަނީ އެކިފަހަރު މަތިން މުސްލިމުންނާ ދެކޮޅަށް ތަފާތު ނުބައި ރޭވުންތައް ރޭވި ޣަޠުފާނުއޭ ކިޔުނު ހިސާބުގައި އުޅުނު ޤަބީލާތަކާ ދެކޮޅަށެވެ. މި ހަނގުރާމަ ހިނގާފައިވާ ތާރީޚަކާމެދު ސިޔަރަތުގެ ޢިލްމުވެރިންގެ މެދުގައި އިޚްތިލާފުވެފައިވެއެވެ. މި ހަނގުރާމަ ހިނގާފައި ވަނީ ހިޖުރައިން 4 ވަނަ އަހަރުކަމުގައި އަދި 5 ވަނަ އަހަރުކަމުގައި، އަދި 7 ވަނަ އަހަރުކަމުގައިވެސް އައިސްފައިވެއެވެ. ބޮޑަށް ބުރަވެވެނީ ޚަންދަޤު ހަނގުރާމައަށްފަހު ހިޖުރައިން 4 ވަނަ އަހަރުކަމުގައެވެ.
ކޮންމެއަކަސް، މި ހަނގުރާމަ ނިމުމަށްފަހު، މުސްލިމުން މަދީނާއަށް އެނބުރި އައި ދަތުރުގައި ގަސްތައް ހެދިފައިވާ ހިސާބެއްގައި މުސްލިމުންގެ ލަޝްކަރު މަޑުކުރިއެވެ. ދުވަސްވަރަކީ އިންތިހާއަށް ހޫނު ދުވަސްވަރެއްކަމުގައި ވުމާއި، ކުރަމުން އައި ދިގު ދަތުރުގެ ވަރުބަލިކަން ފިލުވާލެއްވުމަށްޓަކައި ޞަޙާބީބޭކަލުން އެކި ގަސްތަކުގެ ހިޔަލަށް ވަދެވަޑައިގެންނެވިއެވެ. ރަސޫލުﷲ صَلَّى اللهُ عَلَيْهِ وَسَلَّمَ ވެސް އެތަނުން ގަހެއްގެ ހިޔަލަށް ވަދެވަޑައިގެން، އެކަލޭގެފާނުގެ ކަނޑިކޮޅު ގަހުގައި އެލުއްވައިލައްވައި، ގަހުގެ ހިޔަލުގައި އޮށޯވެވަޑައިގެންފިއެވެ. އިސާހިތަކު، ރަސޫލުﷲ صَلَّى اللهُ عَلَيْهِ وَسَلَّمَ އާއި އެކަލޭގެފާނުގެ ޞަޙާބީންނަށް އަވަހާރަފުޅު ލެއްޕެވިއްޖެއެވެ. ކުރިމަތިވާން އުޅޭކަމުގެ ކުޑަވެސް އިޝާރާތެއް ލިބިވަޑައިގެންފައެއް ނުވެއެވެ.
އަޢުރާބީއެއްކަމުގައިވާ غَوْرَثُ بْنُ الْحَارِثُ އޭ ކިޔުނުމީހަކު ފިލައިފިލައިގެން އައިސް، ރަސޫލުﷲ صَلَّى اللهُ عَلَيْهِ وَسَلَّمَ އޮންނެވި ގަހުގެ ކައިރިއަށް އައިސް އެކަލޭގެފާނުގެ ކަނޑިކޮޅު ނަގައިފިއެވެ. މިއީ އޭނާގެ ޤަބީލާގެމީހުންނަށް ލިބުނު ގެއްލުމުގެ ބަދަލު ހޯދުމަށާއި، ޣަޠުފާނުގެ މީހުންގެ ކައިރީގައި ޝަރަފާއި ޢިއްޒަތް ހޯދުމަށް ލިބުނު ރަނުގެ ފުރުޞަތެއްގެ ގޮތުގައި ދެކުނެވެ. ކަނޑިނަގައި އޭނާގެ ބޮލާހަމައަށް އުފުލާލިވަގުތު، ރަސޫލުﷲ صَلَّى اللهُ عَلَيْهِ وَسَلَّمَ އަށް ހޭފުޅުލެއްވުނެވެ. އެހިނދު، އެ މުޝްރިކުމީހާ އެކަލޭގެފާނަށް ދެންނެވިއެވެ. "ތިމަންނައާމެދު ކަލޭގެފާނު ބިރުފުޅުވަޑައިގަންނަވަމުތޯއެވެ؟" ރަސޫލުﷲ صَلَّى اللهُ عَلَيْهِ وَسَلَّمَ މާތް ﷲއަށް އިތުބާރުކުރައްވައި ސާބިތުކަމާއެކު ޙަދީޘްކުރެއްވިއެވެ. "ނޫނެކެވެ." އޭރު ހުރީ އެކަލޭގެފާނު އަވަހާރަކޮށްލެއްވުމަށް ކަނޑި މަޅާލެވިފައެވެ. އެ ކަނޑީގެ އެތިފަހަރުން އެކަލޭގެފާނު ޙިމާޔަތްކޮށްދޭނެ އައްޑަނައެއްފަދަ އެއްވެސް އެއްޗެއް އެކަލޭގެފާނުގެ އަރިހުގައި ނެތެވެ. މިހުރިހާކަމަކާއެކުވެސް، އެކަލޭގެފާނުގެ ފަރާތްޕުޅުން ކަންބޮޑުވެވަޑައިގަތުމާއި، ބިރުފުޅުގަތުމުގެ އެއްވެސް އަސަރެއް ނުފެނުމުން އެމީހާ ޢަޖާއިބުވެގެން ސުވާލުކުރިއެވެ. "ތިމަންގެ ކިބައިން ކަލޭގެފާނު ސަލާމަތްކޮށްދޭނީ ކާކު ހެއްޔެވެ؟" ސާބިތުކަމާއެކު އެކަލޭގެފާނު ޙަދީޘްކުރެއްވިއެވެ. "ﷲ އެވެ." ބައެއް ރިވާޔަތްތަކުގައިވާގޮތުން އެމީހާ މި ސުވާލު ތިންފަހަރު ތަކުރާރުކުރިއެވެ. ކޮންމެފަހަރަކު އެކަލޭގެފާނު ޖަވާބުގައި ޙަދީޘްކުރެއްވީ ﷲއެވެ.
ބައެއް ރިވާޔަތްތަކުގައިވާގޮތުން އެކަލޭގެފާނުގެ ސާބިތުކަމާމެދު ޢަޖާއިބުވެގެން ބޭއިޚްތިޔާރުގައި ކަނޑި އޭގެ އުރައަށް އެމީހާއަށް ލެވުނެވެ. އަނެއްބައި ރިވާޔަތްތަކުގައިވާގޮތުން އެމީހާގެ އަތުން ކަނޑިވެއްޓުނެވެ. އެހިނދު، ރަސޫލުﷲ صَلَّى اللهُ عَلَيْهِ وَسَلَّمَ ކަނޑި ނަންގަވައި ޙަދީޘްކުރެއްވިއެވެ. "މިހާރު ތިމަންކަލޭގެފާނުގެ ކިބައިން ތިބާ ސަލާމަތްކޮށްދޭނީ ކާކު ހެއްޔެވެ؟" އެމީހާ ސަލާމަތްކޮށްދޭނީ އޭނާ އަޅުކަންކުރާ ބުދަތަކޭ ދަންނަވާކަށް ނުކެރުނެވެ. އޭގެ ބަދަލުގައި އެކަލޭގެފާނުގެ އޯގާތެރިކަމަށް އެދި ދެންނެވިއެވެ. "ހެޔޮގޮތުގައި ތީގައި ހިއްޕަވާ ބޭކަލަކުކަމުގައި ވެވަޑައިގަންނަވާށެވެ!" އެކަލޭގެފާނު ޙަދީޘްކުރެއްވިއެވެ. "ﷲ ފިޔަވައި ޙައްޤުވެގެން އަޅުކަމެއް ކުރެވޭ އިލާހަކު ނުވާކަމަށާއި ތިމަންކަލޭގެފާނަކީ އެކަލާނގެ ރަސޫލާކަމަށް ހެކިވާނު ހެއްޔެވެ؟" އެމީހާ ދެންނެވިއެވެ. " ކަލޭގެފާނާ ހަނގުރާމަ ނުކުރާނެކަމަށް، އަދި ކަލޭގެފާނާ ހަނގުރާމަކުރާ ބަޔަކާއެކުގައިވެސް ތިމަން ނުވާނެކަމަށް ޢަހުދުކުރަމެވެ."
ދެން ރަސޫލުﷲ صَلَّى اللهُ عَلَيْهِ وَسَلَّمَ ޞަޙާބީބޭކަލުންނަށް ގޮވާލައްވައި، ކަންހިނގިގޮތް އެ ބޭކަލުންނަށް ކިޔައިދެއްވިއެވެ. އޭގެފަހުގައި، އެ އަޢުރާބީމީހާ ދޫކޮށްލެއްވިއެވެ. އޭނާގެ ރަށުގެ މީހުންގެ ގާތަށް އޭނާ އައިސް ބުންޏެވެ. "ތިމަން މިއައީ މީސްތަކުންކުރެ އެންމެ ހެޔޮ އިންސާނާގެ ކައިރިންނެވެ." ބައެއް ރިވާޔަތްތަކުގައިވާގޮތުން؛ މިކަމުގެ ސަބަބުން ޣަޠުފާނު ހިސާބުގެ ގިނަ ޢަދަދެއްގެ ބަޔަކު އިސްލާމްވިއެވެ.
ލޮބުވެތި އަޚުންނާއި އުޚްތުންނޭވެ! މުސްލިމުންނަކީ ކޮންމެފަދަ ޙާލެއްގައިވެސް އެބައިމީހުންގެ ވެރި ރަސްކަލާނގެއަށް އިތުބާރުކުރާ ބައެކެވެ. އެކަލާނގެއީ އެންމެހާ ކަމަކަށް ކުޅަދުންވަންތަ ރަސްކަލާނގެކަން ތެދުހިތުން ޤަބޫލުކުރާ ބައެކެވެ. އެކަލާނގެ މިންވަރުފުޅުން މެނުވީ އެއްވެސްމީހަކަށް އެއްވެސް ގެއްލުމެއް ނުދެވޭނެކަމަށް ތެދުހިތުން އީމާންވާ ބައެކެވެ. ވުމަށް އެކަލާނގެ މިންވަރުކުރެއްވިކަމެއް ހުއްޓުވޭނެ ހަމައެކަކުވެސް ނުހުންނާނެއެވެ. އަދި ނުވުމަށް އެކަލާނގެ މިންވަރުކުރެއްވިކަމެއް ކުރެވޭނެ ހަމައެކަކުވެސް ނުހުންނާނެއެވެ.
