އިމާމް ބުޚާރީއާއި އިމާމް މުސްލިމް ރިވާކުރެއްވިއެވެ. ނަބިއްޔާ صَلَّى اللهُ عَلَيْهِ وَسَلَّمَ ޙަދީޘްކުރެއްވިއެވެ. "ބަނޫ އިސްރާއިލުންގެ ތެރޭގައި ތިން މީހަކު އުޅުނެވެ. އެއިގެ ތެރެއިން އެކަކީ ބަރަސްބަލި ޖެހުމުގެ ސަބަބުން ހަންގަނޑާއި ހަންގަނޑުގެ ކުލަ ހުތުރުމީހެކެވެ. ދެވަނަމީހަކީ ބޯ ތަލަވެފައިވާ މީހެކެވެ. ތިންވަނަ މީހަކީ ލޯފަން މީހެކެވެ. ފަހެ، މާތް ﷲ އެބައިމީހުން އިމްތިޙާނުކުރެއްވުމަށް އިރާދަކުރެއްވިއެވެ. އެބައިމީހުން އިމްތިޙާނު ކުރެއްވުމަށް ޓަކައި އެބައިމީހުންގެ ގާތަށް މަލާއިކަތް ބޭކަލަކު ފޮނުއްވިއެވެ. މިގޮތުން، އެންމެ ފުރަތަމަ ބަރަސްބަލި ޖެހިފައިވާމީހާގެ ގާތަށް އިންސާނެއްގެ ސޫރާގައި ވަޑައިގެން ސުވާލުކުރެއްވިއެވެ. "ތިބާ އެންމެ އެދެނީ ކޮންކަމަކަށްތޯއެވެ؟" އެމީހަކު ދެންނެވިއެވެ. "ހަންގަނޑުގެ ކުލަ ރީތިވުމެވެ. އަދި ރަނގަޅު ހަންގަނޑެއް ލިބުމެވެ. އަދި މީސްތަކުން ތިމަންދެކެ ނުރުހުންތެރިވާ މި ބަލިން ދުރުކޮށްދެއްވުމެވެ." ފަހެ، އެ ބޭކަލަކު އެމީހާގެ ގައިގައި އަތްޕުޅު ބީއްސާލެއްވުމުން އެ ބަލި ފިލައިގެން ދިޔައެވެ. އަދި ހަންގަނޑުގެ ކުލަ ރީތިވެ، ހަންގަނޑު ރަނގަޅުވެގެން ދިޔައެވެ. އެބޭކަލަކު ވިދާޅުވިއެވެ. "ތިބާ އެންމެ އެދެނީ ކޮން ވައްތަރެއްގެ މުދަލަކަށް ހެއްޔެވެ؟" އެމީހަކު ދެންނެވިއެވެ. "ޖަމަލެވެ." އެބޭކަލަކު އެމީހަކަށް މާބަނޑުވިތާ ދިހަމަސް ފުރިފައިވާ ޖަމަލެއް ދެއްވައި ވިދާޅުވިއެވެ. "މާތް ﷲ އެ ޖަމަލުގައި ތިބާއަށްޓަކައި ބަރަކާތް ލައްވާށިއެވެ!"

ދެން، ބޯ ތަލަވެފައިވާމީހާގެ ގާތަށް ވަޑައިގެން ވިދާޅުވިއެވެ. "ތިބާ އެންމެ އެދެނީ ކޮންކަމަކަށްތޯއެވެ؟" އެމީހަކު ދެންނެވިއެވެ. "ރީތި އިސްތަށިގަނޑެކެވެ. އަދި މީސްތަކުން ތިމަންދެކެ ނުރުހުންތެރިވާ މި ކަމުން ދުރުކޮށްދެއްވުމެވެ." ފަހެ، އެ ބޭކަލަކު އެމީހާގެ ގައިގައި އަތްޕުޅު ބީއްސާލެއްވުމުން އެމީހާއަށް ރީތި އިސްތަށިގަނޑެއް ލިބުނެވެ. އެބޭކަލަކު ވިދާޅުވިއެވެ. "ތިބާ އެންމެ އެދެނީ ކޮން ވައްތަރެއްގެ މުދަލަކަށް ހެއްޔެވެ؟" އެމީހަކު ދެންނެވިއެވެ. "ގެރިއެވެ." އެބޭކަލަކު އެމީހަކަށް މާބަނޑު ގެރިއެއް ދެއްވައި ވިދާޅުވިއެވެ. "މާތް ﷲ އެ ގެރީގައި ތިބާއަށްޓަކައި ބަރަކާތް ލައްވާށިއެވެ!"

ދެން، ލޯފަންވެފައިވާ މީހާގެ ގާތަށް ވަޑައިގެން ވިދާޅުވިއެވެ. "ތިބާ އެންމެ އެދެނީ ކޮންކަމަކަށްތޯއެވެ؟" އެމީހަކު ދެންނެވިއެވެ. "މީސްތަކުން ދުށުމަށްޓަކައި މާތް ﷲ އަހަރެންނަށް ފެނުން ދެއްވުމެވެ." ފަހެ، އެ ބޭކަލަކު އެމީހާގެ ގައިގައި އަތްޕުޅު ބީއްސާލެއްވުމުން އެމީހާއަށް ފެނުން ލިބުނެވެ. އެބޭކަލަކު ވިދާޅުވިއެވެ. "ތިބާ އެންމެ އެދެނީ ކޮން ވައްތަރެއްގެ މުދަލަކަށް ހެއްޔެވެ؟" އެމީހަކު ދެންނެވިއެވެ. "ބަކަރިއެވެ." އެބޭކަލަކު އެމީހަކަށް މާބަނޑު ކަނބަޅިއެއް ދެއްވައި ވިދާޅުވިއެވެ. "މާތް ﷲ އެ ކަންބަޅީގައި ތިބާއަށްޓަކައި ބަރަކާތް ލައްވާށިއެވެ!"

ދުވަސްކޮޅެއް ފަހެވެ. މި ތިން މީހުންގެ ޖަނަވާރުތައް ވިހައި، ޢަދަދު ގިނަވެގެން ދިޔައެވެ. އެކަކަށް ވާދީއެއް ފުރާ ޖަމަލެވެ. އަނެކަކަށް ވާދީއެއް ފުރާ ގެރިއެވެ. އަނެކަކަށް ވާދީއެއް ފުރާ ބަކަރިއެވެ.

މި ޙާލަތުގައި މިބައިމީހުން ވަނިކޮށް، ކުރިން ބަރަސްބަލިޖެހިފައިވާމީހާގެ ގާތަށް އޭނާއަށް ބަރަސްބަލިޖެހުނު އިރު ހުރި ސޫރާގައި، ހަމައެގޮތަށް އެ މަލާއިކަތަކު ވަޑައިގެން ވިދާޅުވިއެވެ. "އަހަރެންނަކީ މިސްކީނަކީމެވެ. އަހަރެން މި ވަނީ ދަތުރުކުރެވޭނެ ގޮތެއް ނެތި، ޙާލުގައި ޖެހިފައެވެ. މިއަދު، މާތް ﷲއަށްފަހު ތިބާގެ އެހީތެރިކަމެއް ވެދިނިއްޔާނޫނީ އަހަރެން ބޭނުންވާ ހިސާބަކަށް ނުދެވޭނެއެވެ. ތިބާއަށް ކުލަރީތި، ރަނގަޅު ހަންގަނޑަކާއި މުދާ ދެއްވި ކަލާނގެއަށްޓަކައި ބުނަމެވެ. ދަތުރުކުރާނެ ޖަމަލެއް ތިމަންނައަށް ދެއްވާށެވެ!" އެމީހަކު ބުންޏެވެ. "ދެވޭކަށް ނެތެވެ. ޙައްޤުތައް ވަރަށް ގިނައެވެ." އެހިނދު އެ ބޭކަލަކު އެމީހަކަށް ދެންނެވިއެވެ. "އަހަރެންނަށް ތިބާ އެނގޭހެން ހީވެއެވެ. ތިޔައީ މީސްތަކުން އެމީހަކާ ނުރުހުންތެރިވި ބަރަސްބަލިޖެހުނު މީހާ ނޫން ހެއްޔެވެ؟ އަދި ފަޤީރަކު ކަމުގައި ވަނިކޮށް މާތް ﷲ ތިބާއަށް މުދާ ދެއްވި ނޫން ހެއްޔެވެ؟" އެހިނދު އެމީހަކު ބުންޏެވެ. "މިއީ އަހަރެންނަށް ކާބަފައިންގެ ފުށުން ވާރުތަވި މުދަލެވެ." އެބޭކަލަކު ވިދާޅުވިއެވެ. "ތިބާ ތިޔަ ހަދަނީ ދޮގުކަމުގައިވާނަމަ، މާތް ﷲ، ތިބާ އިހު ހުރިގޮތަށް ރައްދުކުރައްވާށިއެވެ!" އެހިނދު ކުރިން ހުރި ޙާލަތަށް އޭނާގެ ޙާލަތު ބަދަލުވެގެން ދިޔައެވެ.

ދެން ކުރިން ތަލަކޮށް ހުރި މީހާގެ ގާތަށް، އޭނާ ކުރިން ހުރި ސޫރާގައި، ހަމައެގޮތަށް އެ މަލާއިކަތަކު ވަޑައިގެން ވިދާޅުވިއެވެ. "އަހަރެންނަކީ މިސްކީނަކީމެވެ. އަހަރެން މި ވަނީ ދަތުރުކުރެވޭނެ ގޮތެއް ނެތި، ޙާލުގައި ޖެހިފައެވެ. މިއަދު، މާތް ﷲއަށްފަހު ތިބާގެ އެހީތެރިކަމެއް ވެދިނިއްޔާނޫނީ އަހަރެން ބޭނުންވާ ހިސާބަކަށް ނުދެވޭނެއެވެ. ތިބާއަށް ރީތި އިސްތަށިގަނޑަކާއި މުދާ ދެއްވި ކަލާނގެއަށްޓަކައި ބުނަމެވެ. ދަތުރުކުރަން ބޭނުންވާނެ ގެރިއެއް ތިމަންނައަށް ދެއްވާށެވެ!" އެމީހަކު ބުންޏެވެ. "ދެވޭކަށް ނެތެވެ. ޙައްޤުތައް ވަރަށް ގިނައެވެ." އެހިނދު އެ ބޭކަލަކު އެމީހަކަށް ދެންނެވިއެވެ. "އަހަރެންނަށް ތިބާ އެނގޭހެން ހީވެއެވެ. ތިޔައީ މީސްތަކުން އެމީހަކާ ނުރުހުންތެރިވި ބޯ ތަލަކޮށް ހުރި މީހާ ނޫން ހެއްޔެވެ؟ އަދި ފަޤީރަކު ކަމުގައި ވަނިކޮށް މާތް ﷲ ތިބާއަށް މުދާ ދެއްވި ނޫން ހެއްޔެވެ؟" އެހިނދު އެމީހަކު ބުންޏެވެ. "މިއީ އަހަރެންނަށް ކާބަފައިންގެ ފުށުން ވާރުތަވި މުދަލެވެ." އެބޭކަލަކު ވިދާޅުވިއެވެ. "ތިބާ ތިޔަ ހަދަނީ ދޮގުކަމުގައިވާނަމަ، މާތް ﷲ، ތިބާ އިހު ހުރިގޮތަށް ރައްދުކުރައްވާށިއެވެ!" އެހިނދު ކުރިން ހުރި ޙާލަތަށް އޭނާގެ ޙާލަތު ބަދަލުވެގެން ދިޔައެވެ.

ދެން ކުރިން ލޯފަންކޮށް ހުރި މީހާގެ ގާތަށް، އޭނާ ކުރިން ހުރި ސޫރާގައި، ހަމައެގޮތަށް އެ މަލާއިކަތަކު ވަޑައިގެން ވިދާޅުވިއެވެ. "އަހަރެންނަކީ މިސްކީނަކީމެވެ. ޙާލުގައި ޖެހިފައިވާ ދަތުރުވެރިޔަކީމެވެ. އަހަރެން މި ވަނީ ދަތުރުކުރެވޭނެ ގޮތެއް ނެތި، ޙާލުގައި ޖެހިފައެވެ. މިއަދު، މާތް ﷲއަށްފަހު ތިބާގެ އެހީތެރިކަމެއް ވެދިނިއްޔާނޫނީ އަހަރެން ބޭނުންވާ ހިސާބަކަށް ނުދެވޭނެއެވެ. ތިބާއަށް ފެނުން ދެއްވައި، މުދާ ދެއްވި ކަލާނގެއަށްޓަކައި ބުނަމެވެ. ދަތުރުކުރަން ބޭނުންވާނެ ބަކަރިއެއް ތިމަންނައަށް ދެއްވާށެވެ!" އެމީހަކު ބުންޏެވެ. "ލޯ ފަންމީހެއްގެ ގޮތުގައި އަހަރެންވީމެވެ. މާތް ﷲ އަހަރެންނަށް ފެނުން ދެއްވިއެވެ. ތިބާ ބޭނުން ވަރަކަށް އެތަނުން ބަކަރި ނަގާށެވެ! އަދި ބޭނުންވާ ވަރެއް ބަހައްޓާށެވެ! ފަހެ، ﷲ ގަންދީފައި ބުނަމެވެ. ﷲއަށްޓަކައި މިއަދު ތިބާ ނަގާ އެއްޗަކާމެދު އަހަރެން ދެކޮޅު ނަހަދާހުށީމެވެ!" އެހިނދު އެބޭކަލަކު ވިދާޅުވިއެވެ. "މި ބަކަރިތައް ތިބާ ބަހައްޓާށެވެ! މިއީ ތިޔަބައިމީހުން ކުރެވުނު އިމްތިޙާނެކެވެ. ފަހެ، މާތް ﷲ ތިބާއަށް ރުއްސަވާވޮޑިގެންފިއެވެ. އަދި ތިބާގެ ދެ އެކުވެރިންނާމެދު އެކަލާނގެ ނުރުއްސެވިއެވެ."

މުދަލާއި އެނޫންވެސް ނިޢުމަތްތައް ލިބިފައިވާ އަހުލުންނޭވެ! މި ދުނިޔެ މަތީގައި ލިބިފައިވާ މުދަލާއި ތަފާތު އެކި ނިޢުމަތްތަކަކީ އިސާހިތަކު ފިލައިދަނިވި ނިޢުމަތްތަކެކެވެ. އެ ނިޢުމަތްތައް ދެއްވަވާފައިވަނީ އިމްތިޙާނަކަށްޓަކައެވެ. ހެޔޮމީހަކީ ތިމާއަށް ލިބިފައިވާ ނިޢުމަތްތަކަށް ޝުކުރުވެރިވާމީހާއެވެ. ލިބިފައިވާ މުދަލުގެ ނިޢުމަތުން އެހެންމީހުންނަށް ﷲއަށް ޓަކައި ހެޔޮފޯރުކޮށްދީފި މީހެކެވެ. އެ މުދާތަކާ ވަކިވެ ދާންޖެހޭނެކަން ދަންނާށެވެ! އެކަލާނގެއަށްޓަކައި އަމިއްލަ ނަފްސަށާއި، އަހުލުންނަށާއި، ބޭނުންޖެހިފައިވާ މީހަކަށް ކޮށްފައިވާ ޞަދަޤާތަކުންނާއި، މީސްތަކުންނަށް ހެވަށް އެދި ހޭދަކޮށްފައިވާ ހޭދަކުރުމަކުން މެނުވީ ތިބާގެ މުދަލަކުން ތިބާއަށް މަންފާއެއް ނުކުރާނެއެވެ. ޝުކުރުވެރިވެއްޖެ އަޅަކަށް މާތް ﷲ އިތުރުކޮށް ދެއްވާނެއެވެ. ޝުކުރުވެރި ނުވެއްޖެ އަޅަކަށް އެކަލާނގެ ޢުޤޫބާތް ގަދަފަދަވެގެންވެއެވެ.