އައްޝައިޚް ޝަފީޢު ޢަބްދުﷲ
ހައްދުފަހަނަޅުމަކީ އުންމަތަށް ދިމާވެފައިވާ ވަރަށް ބޮޑު ނުރައްކަލެކެވެ. އެކަމުގެ އެންމެ ބޮޑު ނުރައްކަލެއް އޮތީ މުސްލިމުންނަށެވެ. އެހެނީ، ހައްދުފަހަނަޅި މީހުންގެ އުދަނގުލާއި ތުރާ އެންމެ ބޮޑަށް ތަޙައްމަލުކުރަން ޖެހޭ ބަޔަކީ އާންމު މުސްލިމުންނެވެ.
ނަބިއްޔާ صلى الله عليه وسلم ގެ ޒަމާނުގައި ޚުދު އެކަލޭގެފާނަށް ވެސް އެފަދަ މީހުންގެ އުދަނގޫތައް ބަރުދާސްތުކުރައްވާން ޖެހިވަޑައިގަތެވެ. އެ މީހުންގެ ރޫޙާނީ ބައްޕަކަމަށްވާ ޛުލްޚުވެއިޞިރާ އެކަލޭގެފާނާ މުޚާޠަބުކޮށް ބުނީ، އޭ މުޙައްމަދެވެ! ކަލޭގެފާނު ޢަދުލުވެރިވާށެވެ. އޭނާ ތުހުމަތުކުރީ އެކަލޭގެފާނަކީ ބޭއިންޞާފުވެރި ބޭކަލެއްގެ ކަމުގައެވެ. އާދެ، ޢަދުލުގެ މީޒާނާއިގެން މާތް ﷲ ގެ ޙަޟްރަތުން ވަޑައިގެންނެވި މާތް ސާހިބާ މުޙައްމަދު صلى الله عليه وسلم އާ މެދު އޭނާ ދުށީ ބޭއިންޞާފުވެރި ބޭކަލެއްގެ ގޮތުގައެވެ. އެހެންކަމުން، އޭނާ އެކަލޭގެފާނަށް ނަސޭހަތްދިނީ ޢަދުލުވެރިވުމަށެވެ.
މި ޛުލްޙުވައިޞިރާއަކީ ހުރިހައި ޒަމާނެއްގައި އަންނާނެ ހައްދުފަހަނަޅި މީހުންގެ ރޫޙާނީ ބައްޕައެވެ. އެބައިމީހުންގެ ނަޒަރުގައި ދީނީ ޢިލްމުވެރީންނާއި އާންމު މުސްލިމުންނަކީ ދީނަށް ޚިޔާނާތްތެރިވެފައިވާ ބައެކެވެ. ޚާއްޞަކޮށް ޢިލްމުވެރީންނަކީ ދީނަށް ޚިޔާނާތްތެރި ބައެއްކަމުގައި ދެކެއެވެ. ހަމަ އެންމެ ސަބަބަކާ ހުރެއެވެ. އެއީ އެބައިމީހުން ގަބޫލުކުރާ ހައްދުފަހަނަޅި ފިކުރަކީ ރަނގަޅު ފިކުރެއް ކަމަށް ޢިލްމުވެރީން ދެކެވަޑައިނުގަންނަވާތީއެވެ. އެބައިމީހުން ޙައްޤުކަމަށް ދެކޭ ހައްދުފަހަނަޅި ކަންކަމަކީ ޙައްޤުކަމަށް އެ ޢިލްމުވެރީން ދެކެވަޑައިނުގަންނަވާތީއެވެ.
މިއީ މި ފިކުރުގެ ނުރައްކާތެރިކަން ހުރި މިންވަރެވެ. ވުމާއެކު، މިފަދަ ފިކުރެއްގެ މީހުންގެ ނިޝާނޭ ބުނެ ދީނުގައި ކަނޑައަޅުއްވާފައިވާ އަސާސީ ކަންކަން ހިމެނުމަކީ ދީނާ މެދު ނަފުރަތު އުފެއްދުން ކަމާ މެދަކު ޝައްކެއް ނެތެވެ. އެއީ މި ކިޔާ "އިސްލާމޮފޯބިއާ"އެވެ. ދީނީ ކަންކަން ދެކެ ރުޅިއެރުމެވެ. ދީނީ ކަންކަމާ ހެދި ލޭބަލްކުރުމެވެ. އެކަމާ ހެދި ތަފާތުކުރުމެވެ.
މި ހައްދުފަހަނަޅި ފިކުރު ވަކިކުރަންޏާ ކުރާންވާނީ، އެބައިމީހުންގެ ހައްދުފަހަނަޅި ފިކުރާ ގުޅުވައިގެންނެވެ. ނަމާދަށް އަހައްމިއްޔަތުކަން ދޭތީ، ނުވަތަ ތުނބުޅި ބެހެއްޓުމާއި މޫނު ބުރުގާ އެޅުން ފަދަ ދީނީ ޝިޢާރުތަކަކީ ހައްދުފަހަނަޅައި ދިޔުމުގެ ނިޝާންކަމަށް ލޭބަލްކުރުމަކީ ކަނޑައެޅިގެން ގޯހެކެވެ. ހުޅަނގުން ކަނޑައަޅާ މިންގަނޑުތަކުން އެކަން ކުރާން އުޅެފިއްޔާ، މުޅި އިސްލާމްދީނަކީ ހައްދުފަހަނަޅައިފައިވާ ދީނެއް ކަމުގައި ކަނޑައެޅުނީއެވެ.
މިބައިމީހުންގެ ޚާއްޞަ ސިފަތަކަކީ، އާންމު މުސްލިމުން ކާފަރުކުރުމެވެ. ކާފަރު ކުރުމުގައި ހައްދުފަހަނަޅައި ދިޔުމެވެ. އެ ގޮތުން، މަތިމައްޗަށް އާންމު މުސްލިމުންނާއި ޢިލްމުވެރީން ކާފަރުކުރުން ހިމެނެއެވެ. ޢިލްމުވެރީން ތިބީ މަގުފުރެދިފައިކަމަށް ދެކި، ޢިލްމެއް ލިބިފައި ނެތް އެބައިމީހުން "އިމާމުން"ކަމަށް ބަލާ ޖާހިލުންގެ ބަހަށް ހެއްލުން ހިމެނެއެވެ.
މައްސަލައަކީ ނާޒުކު މައްސަލައެކެވެ. ހައްދުފަހަނަޅުމަކީ ކޮބައިކަމާއި އެ ކަންކަމަށް ޒުވާނުން ދާ ގޮތާއި ސަބަބުތައް ދެނެގަނެ އެ ކަންކަމަށް އަޅާންޖެހޭ ފިޔަވަޅުތަކަކީ ކޮބައިކަން އެއީ ދީނީ ޢިލްމުވެރީން މެދުވެރިކޮށް، ދީނީ ޢިލްމުވެރީން ހިމަނައިގެން ޝަރުޢީ މަންހަޖާ އެއްގޮތަށް ކުރާންޖެހޭ ކަމެކެވެ. އެއީ ހުޅަނގުން ކަނޑައަޅާ މަންހަޖަށް ތަބާވެ، އެ ތަންތަނުން އެ ކަމުގައި ދަރިވަރުވެގެން އައިސް އެކަމާ ބެހޭ މުއައްސަސާތަކާ ހަވާލުވެގެން ހިތުހުރި ގޮތަކަށް ދީނީ ކަންކަމަކީ ހައްދުފަހަނަޅުން ކަމުގައި މުޖުތަމަޢަށް ވިސްނައިދީގެންވާނޭ ކަމެއް ނޫނެވެ. އެއިން ނުކުންނާނީ، އިތުރު މައްސަލަތަކެވެ. އިތުރު ހައްދުފަހަނަޅުމެވެ.
ބައްޔަކަށް ދޭން ޖެހޭ ފަރުވާ ނުވަތަ ބޭސް ނުބައިވެއްޖެއްޔާ، ބަލި އިތުރަށް ބޮޑުވެ ފުރާނައަށް ނުރައްކާވާ ފަދަ ހާލަތަކަށް ދިޔުން އޮންނާނީ ދާދި ގާތުގައެވެ. މިހާރު މި ދަނީ އެކަހަލަ ދިމާއަކަށެވެ. ވަގުތު ފާއިތުނުވަނީސް ރަނގަޅު ބޭސް ފަރުވާ، ކަމާ ގުޅޭ ޙަކީމުން މެދުވެރިކޮށް ދިނުން މި އޮތީ ކޮންމެހެން ލާޒިމުވެފައެވެ.
